Gal 1 | SWP | STEP | Eau Paulo, aposotolo tauna — nige tatao enadi eo nige tatao se hetorogu, na Iesu Keriso debana eai eo Eaubada, Tamana, iaede mate eai Iesu i hetorouioi wa

Galatians 1

1 Eau Paulo, aposotolo tauna — nige tatao enadi eo nige tatao se hetorogu, na Iesu Keriso debana eai eo Eaubada, Tamana, iaede mate eai Iesu i hetorouioi wa— 2 eo egu tataoyao gamagaridi isi maeguyao, omi ekalesia Galatia enamiu ina:

3 Ainauia bena enamiu, eo loni, Eaubada Tamada arinai i laowa, eo eda Guiau Iesu Keriso, 4 ia i moselaeuioi wa eda baaea debadi eai, teina tanoubu baaeana eai ta bena i abihemaurida, Eaubada, Tamada, ena nuatu i lauwatai ede; 5 ana tepo hedebasaena i abi, i lau e huia nige nosina. Amen.

6 Ea nooemiu, paana huiana i kuu ariri na tauyogahaimiu Keriso ena ainauia boeana eai wa au nuagabaei, au sinibui evanelia udoi hesabana— 7 evanelia udoina nige’e, na headi mo nuamiu se heponopono, Keriso ena evanelia bena se hegewagewa. 8 Na ena ai, e aneru esau galewa eai i laoma, evanelia udoi i guguiaimiu, nige doha evanelia ai ai guguiaimiu wa, ia abo se riba‐hebaaea aririei. 9 Doha ai heribamiu wa, hinage abo‐ina ea heribauioimiu ta, ea ene, Ena taba tau esau evanelia udoi i guguiaimiu, nige doha evanelia ai guguiaimiu wa, ia abo se hebaaea aririei.

Paulo ena evanelia, nige i abi hari aposotolo aridi eai, na Eaubada ena hemahemasaraha eai.

Gal. 1.10-2.14

10 Eau egu aiaipate saha, bena tatao nuadi ea hebiga, e Eaubada? E bena tatao nuadi ea helolodi? Ena eau soragu tatao ea henuhenualolodi, taba nige eau Keriso ena heaheari tauna.

11 Na egu tataoyao e, ea heribamiu ta bena au nuatui, evanelia wa ea lauguguiaimiu, nige tatao enadi. 12 Nige tau esau arinai ea abi, nige tau esau i heatagu, na Iesu Keriso ena hemahemasaraha eai mo ea aabi. 13 Egu miamia nabada wa, Iudea edi tabatabaohu dobilana eai, wasana au ataieyao, Eaubada ena ekalesia eau tauheamamnadi ede, taba nige ta ribaei, eo ea hetatagorigoridi; 14 eo Iudea edi tabaohu arinai egu eanua tataodi ea saetawatawaedi, tamamaiyao edi laulau aridi eai nuagu se gigibori ariariri. 15 Na Eaubada ena nualolo ede, sinagu bogana eai i abihineriguo, huia ne ena ainauia eai i eogahaigu wa, 16 Natuna i hemasarahayama eau boeagu eai, bena Murimuri‐tataodi aridi eai ia ea lauguguiai; nei huiana ne eau nige buluma eo osina aridi eai ea oioiriba, 17 hinage nige ea sae Ierusalema, isi aposotolo eai se mugamugaiegu wa aridi eai, na ea lausuara mo Arabia eai; abotai ea seuio Damaseko eai.

18 Borimai haiona murina eai abotai ea sasae Ierusalema, bena Petero ea ita, ia arinai ea mimia asubena saudoudoi‐haligigi. 19 Aposotolo headi nige ea itadi, Iamesi iabom mo, ia Guiau ena tau wa. 20 (Teina ginauridi ea uriuridiwa, agutoi, Eaubada matana eai nige ea boraimiu!) 21 Murina eai ea laoma Suria eo Kilikia tehadi eai. 22 Keriso ena ekalesia Iudea eai sora agu ao se hekau; 23 wasa se ribaei mo se ataiei, si ene, “Nabada tauheamamnada wa, sunumana lahinai i hebahebaaea wa, wau‐ta i guguguiai.” 24 Eau debagu eai Eaubada se hedebasaei.